«Հանրաքվեն չի լինելու այն մասին,
թե ինչ կարծիք ունի ժողովուրդը ԵՄ-ին անդամակցելու վերաբերյալ, դա լինելու է որոշում
ԵՄ-ին անդամակցելու մասին։ Այլ հարց է, որ
այդ որոշման իրականացման ժամկետները, ծավալները, հերթականությունը և այլն իշխանությունները
պետք է իրենք որոշեն։ Կարող է հարցը նաև այնպես ձևակերպված լինել, որ այդ կետը մտնի
Սահմանադրություն։ Այսինքն՝ ՀՀ ժողովուրդը որոշում է Սահմանադրության մեջ փոփոխություններ կատարել, որ ՀՀ-ն պետք է դառնա
ԵՄ անդամ»: Այս մասին ասաց «Ազատ քաղաքացի» ՀԿ-ի ղեկավար Հովսեփ Խուրշուդյանը՝ անդրադառնալով
իշխանական պատգամավոր Արսեն Թորոսյանի դիտարկմանը, որ ԵՄ-ին ինտեգրվելու համար հանրաքվե
անցկացնելը չի համապատասխանում Սահմանադրությանը, քանի որ հանրաքվեն լինելու է որպես
ժողովրդի կարծիք, բայց ոչ ինտեգրվելու որոշում, իսկ Սահմանադրությամբ նախատեսված է,
որ վերպետական կառույցներին միանալու որոշման դեպքում միայն կարելի է հանրաքվե անցկացնել։
Խուրշուդյանը նշեց, որ 100-120 օրվա ընթացքում հարկավոր է անցկացնել հանրաքվեն,
իսկ թե արդյոք ԵՄ-ն պատրա՞ստ է ընդունել Հայաստանին իր կազմ, եթե հաշվի առնենք, որ
27 պետություն պետք է հավանություն տա, նա պատասխանեց. «Իհարկե խնդիր է, որ դա ԵՄ-ն
պետք է լուծի։ Հունգարիայի խնդիրը, որը հիմնական խնդիրն է լինում նման դեպքերում, ԵՄ-ն պետք է լուծի սանկցիաների
միջոցով»։
Քաղաքագետը նշեց, որ 2022թ.-ից
հետո, երբ ՌԴ-ն հարձակվեց Ուկրաինայի վրա, տարածաշրջանում շատ բան է փոխվել. «Այն ժամանակ Արևմուտքը ընդունում էր, որ
սա Ռուսաստանի պատասխանատվության գոտին է, բայց Ուկրաինայի դեմ հարձակումով Արևմուտքը
հասկացավ, որ սա ՌԴ-ի անպատասխանատվության գոտին է, ու այս երկրները ՌԴ-ի համար զոհեր
են, և ԵՄ-ի կողմից ավելացավ արագությունը այս երկրներին ընդունելու այդ կառույց»։
Ըստ նրա՝ հիմա նաև շատ կարևոր
է օր առաջ Թուրքիայի հետ հարաբերությունների կարգավորումը. «Պետք է բացել սահմանները,
որպեսզի եթե հանկարծ Վրաստանի աշխարհաքաղաքական փոփոխության հետևանքով փակվեն Հայաստան
եկող որոշ ճանապարհներ, մենք այլընտրանքի հնարավորություն ունենանք Թուրքիայի միջոցով։ Ու եթե մենք դուրս ենք գալիս ԵԱՏՄ-ից ու ՀԱՊԿ-ից,
ապա կարծում եմ, որ մեր ապագան լինելու է ՆԱՏՕ-ում, իսկ այդ շրջանակներում պետք է կարողանանք
լեզու գտնել Թուրքիայի հետ»։
Մանրամասն՝ տեսանյութում։
Դավիթ Լևոնյան
